كل سنة وانتا طيب

انا طيب قوي

بجد طااااااااااااااااااايب بص ياسيدي

انا طيب ....... كلمه بيقولها ناس كتير وهما من جواهم حاسين بالندم ,

الشخص رقم 1 بيقول : لا لا انا عارف ان انا طيب , دا مش عيب فيا , انا بس اختارت انسان غلط استخدم معاه طيبتي

---------

الشخص رقم 2 بيقول : احنا اساسا فى زمن مينفعش فيه واحد طيب يعيش , زمن فيه الغدر والخيانه دين ومله واتباع ودوله زمن فيه الغلط صح والصح غلط , زمن فيه الطيب اهبل وعبيط والغدار لاعيب وجامد وشديد وولد بصحيح ...

-----

طيب يارقم 2 : هل نفسك تبقى مش طيب واهبل وغلبان وعبيط

رقم 2 : لا لا مش قصدي مستحيل انا مش قصدي كدا , احنا اساسا فى زمن العجايب زمن متلاقيش فيه صاحب بحق وحقيقى ولا اخ ولا صديق ولا قريب فى وقت شدتك , كل اللى بيقرب منك محتاج حاجه ياما مصلحه ياما مصلحه .... المصلحه فوق الصداقه

انتا تضحيله وتبيع نفسك علشانه وهوا يبيعك وتتخدع بالسكينه على خوانه وابكي واقول ايه غير ايوه على دا زمن

------

الشخص رقم 3 : انا طيب ونفسى ابقى صايع ازاى معرفش

طيب يارقم 3 : يعني ايه صايع

رقم 3 : يعنى ابقى مفتح ولافف يعني مفيش حد يقدر يضحك عليا يعني , يعنى ابقى ناصح واعمل اشتغلات وابقى بتاع حوارات

يارااااااااجل .... وايه تاني

رقم 3 : عادي بقى اترازل على الناس , اعمل مقالب , انصب , ابقى حوارنجي , امشى مع بنات كتير , اشتم , اعيش دنيا , نفسى اعمل كل حاجه

ياخبر كل دا وانتا طيب

----

المهم

رقم 1 انسان بسيط جداً عايش حياته فى امان الله يتمتع بحياة هادئه مستقرة ليه اصدقاء مفضلين ومقربين دايما يقوم بدور الخدوم والاخ والصديق والاب والام والاخت وابن العم ليهم هوا حاسس انه كل حاجه فى حياتهم لكن بيتصدم على يوم بيلاقى ان افكاره كانت من اتجاه واحد وللاسف مشاعره اللى راحت ندم عليها لانها كانت لحد ميستحقش

------

رقم 1 : لاءه انا مندمتش انا عملت زي الناس الكويسين مبيعملوا انا مبستناش حاجه من حد اقصد يمكن اه انا طيب وبقيت بحس ان فيه ناس حواليا بيستغلوني , لكن انا كدا وهفضل كدا اكيد بس انا صادفت ناس متستحقش لكن الدنيا مليانه خير وفيه ناس كتيره تستحق ودا مش هيأثر عليا ............

ياااااااااااارب تصدق

--------

رقم 2 انسان معقد حياته خاليه من الالوان ايام بتتلون باللون الابيض زاهيه لكنها قليله جدا لا يكاد يحس بوجودها وايام اخري اشد سوادا من الليل فى غياب القمر واشد اضرابا من البحر واكثر تقلباً من لون جلد الافعي زاهيه الالوان غير انه ليس ثابتا فهي تخلع جلدها كاشفة عن جلد اخر يزينها مخفية سما فى احشائها وحسيسا مرعباً من فوهتها ....

رقم 2 انسان له نظره تشاؤمية تجاه الاشياء دائما ينهي بها ايامه الجميله وينتقل للعيش فى عشه المفضل المليء بالطين ينعي حظه العاثر ليه

-------

معلومه : رقم 2 يحتاج رقم 1 فى حياته ليغير معالمها ونوعية رقم 1 قليله رقم 2 يحتاج شخص صادق قريب منه دائما لا يمل احاديثه ونظراته التشاؤميه عن صديق راحل وحبيب غادر واقرباء فيهم الكثير من جفاء .

-----

رقم 2 : يارب اموت علشان الطيبين اللي زيي ماتو من زمان وديني ليهم يارب انا عايش ليه وسط الوحوش دول اعمل معاهم ايه ... يارب خدني

---

رقم 3 شخص غريب ... اسف علي الخطأ اقصد طفل غريب الأطوار .. طفل مهما بلغ عمره .. طفل متطلع الى الغير .. امعه

لكنه عندما تسيطر عليه طيبته عندما يتكلم من منطلق عبيط بجد وهوا يضحك بمليء فمه على واحد وقع ست كبيره او واحد سرق حاجه من محل وهوا يتصور بطله المفضل وصديقه وهوا بيعمل فيه مقلب ويبتسم فى محاولة منه لاستجداء رضا بطله المغوار

تقريبا شخص بلا شخصيه وانسان بلا هويه دا مش علشان هوا عايز ينخلع من طيبته

لكن لانه فقط يصفق لمن فى المسرح ويكتفى بتعليق صورهم وليس له دور فى الحياه يشعر بقله قيمه داخله يشعر بعدم ثقه تنهي وتودي بكل كينونته فى البقاء متفرجاً مبتسما مصفقا ... للأبد

كان ليا صديق طيب كان نفسه يبقى صايع كان بيقول زي رقم 3 كان لما يقولى انه نفسه يعمل حاجه زي الناس الصايعه اللى مش طيبه زيه

بلا تردد اقوله اعملها كان في الاول يمتنع فى خجل ويقلل من قدراته لكني كنت دائما اقوله انه هيفضل فى المرحله دي مش هينتقل منها

هيفضل نفسه يعمل زيهم ومش هيسمع كلام حد بيقوله انهم غلط

وبعدين بقى زيهم

وقالى انا حاسس انى عايز ارجع طيب زي زمان

--

كل سنه وانتا طيب

--

ملحوظه : لا تنصح احد انه يكون مش طيب